Теннистен АҚШ ашық чемпионатында қазақтың тағы бір жұлдызы жанды!

Жаңа тарих жазылып жатыр. Нью-Йорк төрінде көк байрақты желбіретіп жүрген 17 жастағы қазақ баласы бар. Аты – Заңғар Нұрланұлы. Заңғар биыл тұңғыш рет жасөспірімдер арасында "Үлкен дулыға" турниріне қатысып отыр. Бірақ алғаш рет қатысса да, қорыққан жоқ, тосылған жоқ. Қарсы келгеннің бәрін қаймықтырды.

Алғашқы айналымда АҚШ өкілі Рошан Сантошты екі сетте ұтты – 6:3, 6:3.
Келесі кезеңде Польша үміті, ATP рейтингінде №1750 тұрған Адам Важныны қапы қалдырды – 6:4, 6:4.
Үшінші айналымда әлем жасөспірімдерінің үздік ондығында тұрған финляндиялық Оскари Палданиус алғашқы сетте жеңіске жеткенімен, қазақ жігіті қайсарлық танытып, келесі екі сетте 6:1, 6:2 есебімен айқын басымдық көрсетті.

Бұл – жай ғана жеңіс емес. Бұл – рухтың жеңісі, төзім мен тердің жемісі!

Заңғар Нұрланұлы қазіргі таңда жасөспірімдер арасында ITF рейтингінде 54-орында. Тенниспен Алматыда айналыса бастаған, ал соңғы бес жылда Словакия топырағында шыңдалып жүр. Ол биыл барлық юниорлық "Үлкен дулыға" додасына қатысты. Бірақ ең сәтті шыққаны – осы US Open.

Ал енді алда – ширек финал. Қарсылас – ресейлік Тимофей Дерепаско, жасы 18-де, ATP рейтингінде №925.

Еске салайық, бұл – Қазақстан тарихындағы екінші ширек финал. Былтыр, 2024 жылы, Амир Омарханов Australian Open додасында осы кезеңге жеткен еді. Ал енді Заңғар соны қайталап қана қоймай, ары қарай да асуға бекініп отыр.

Тағы бір ерекше мәлімет – Заңғар биыл жылдың басында әлемнің 1-ракеткасы, италиялық Янник Синнермен бірге жаттыққан. Осындай деңгейге шыққан спортшының көздегені – тек жеңіс.

Айтпақшы, ол жеңген поляк теннисшісі – әлемнің жасөспірімдер арасындағы 13-ракеткасы, ал финляндиялық Оскари – 8-орында. Ендеше, бұл жеңістер кездейсоқ емес!

Түгелбай Бисен

Сурет:ҰОК