Түркістан төрінде өткен тартыс: облыс құрамасы топ жарды

Қазанның 7-сі мен 12-сі аралығында Түркістан облысында аралас туризм техникасынан республикалық жарыс өтті. Еліміздің әр өңірінен келген жас туристер бірнеше күн бойы шыдамдылық пен шеберлікті талап ететін сындарда бақтарын сынады.

Аталмыш бәсекеге еліміздің 7 өңірінен 100-ден астам спортшы қатысып, тартысты додаға айналған жарыс жүлделерін сарапқа салды. Қорытындысында Батыс Қазақстан облысының командасы жоғары нәтиже көрсетті. «Балалар», «Жасөспірімдер» және «Ересектер» санатында өнер көрсеткен облыс құрамасы үш топтың да командалық есебінде бірінші орынды иеленді.

Жекелей сындарда да өңір спортшылары үздік нәтижелермен көзге түсті. Атап айтқанда, Гүлмира Ерғали, Айару Оразалы және Ерасыл Ишанов өз топтарында бірінші орынды жеңіп алса, Ерлан Нығметов, Гүлизар Жұмағалиева, Бекбарыс Қасымғали және Нұрсәуле Марат екінші орынды еншіледі. Сонымен қатар Әмірхан Жәңгірханұлы мен Темірлан Кенжемұрат елішілік жарыстың бас жүлдесіне ие болды.

Республикалық жарыста оза шапқан облыс құрамасы Ақжайық, Бөрлі, Жәнібек, Казталов, Қаратөбе және Тасқала аудандарынан жасақталған. Бұл жетістікке өңірлік туристік қозғалыстың дамуына сүбелі үлес қосып жүрген  Камшат Неталиева, Әди Темірболат және Ерлан Нығметов сынды азамат-азаматшалардың еңбегі елеулі.

Айта кетейік, туризм техникасы бойынша ұйымдастырылатын мұндай ауқымды жарыстар жастардың табиғатқа деген сүйіспеншілігін арттырып, олардың шыдамдылық, төзімділік, ептілік сынды қасиеттерін шыңдай түсуге сеп болады.

Түгелбай Бисен