Даниал Амангелді Қазақстанның U-15 ұлттық құрамасына шақырту алды

Оралдық жас баскетболшы Даниал Амангелді 15 жасқа дейінгі Қазақстан ұлттық құрамасының сапына шақырту алды. Бұл – жас спортшының табанды еңбегі мен тұрақты ізденісінің нәтижесі.

Дарынды ойыншы бірнеше күн бойы Щучинск қаласында өткен оқу-жаттығу жиынына қатысып, ұлттық құраманың бапкерлер штабының сеніміне ие болды. Алдағы уақытта Даниал Қазақстан құрамасының сапында халықаралық жарыстарда ел намысын қорғайтын болады.

Даниал – «BQO Arlans» баскетбол клубының болашағынан зор үміт күттіретін ойыншыларының бірі. Жасына қарамастан өзін жақсы қырынан танытып жүрген баскетболшының ұлттық құрамаға шақырылуы оның спорттағы алғашқы үлкен жетістіктерінің бірі саналады.

Айта кетейік, соңғы екі жылда «BQO Arlans» клубы Қазақстанның түрлі жас санатындағы ұлттық құрамаларына төрт ойыншы тәрбиелеп шығарды. Бұған дейін Мансұр Сейілханов, Арсен Батенов және Құдайберген Бейбарыс ұлттық құрамаларға шақырту алған болатын. Енді бұл тізімді Даниал Амангелді толықтырды.

Бұл көрсеткіш «BQO Arlans» клубында жас баскетболшыларды даярлау жүйесінің нәтижелі жұмыс істеп жатқанын көрсетеді. Клуб тәрбиеленушілерінің ұлттық құрамаға тұрақты түрде шақырылуы өңір баскетболының даму қарқынын айқындай түседі.

Даниал Амангелдіні айтулы жетістігімен құттықтап, Қазақстан құрамасы сапында сәтті ойын көрсетіп, халықаралық ареналарда ел намысын абыроймен қорғауына тілектеспіз!