Эльнар Жанболатұлы Жайық барысы

Оралдағы «Жайық Арена» спорт кешенінде өткен «Қазақстан Барысы» республикалық турнирінің облыстық іріктеу кезеңі мәресіне жетті. Ұлттық спорттың мерейін үстем еткен дүбірлі додада өңірдің 12 ауданы мен Орал қаласынан келген 23 апайтөс палуан бозкілемге шығып, жанкүйерлерге тартысқа толы белдесулер сыйлады.
Жайық жұртының делебесін қоздырған жарыста палуандар тек күш сынасып қана қоймай, қайсарлықтың, табандылықтың және жеңіске деген жігердің қандай болатынын көрсетті. Әр белдесу – намыстың шайқасы, әр жеңіс – маңдай тердің жемісі болды.
Бірінен-бірі өткен мықтылар жиналған додада финалдық белдесу де аса тартысты өтті. Шешуші сында Ақжайық ауданының намысын қорғаған Эльнар Жанболатұлы мен сцрымдық Мерей Бердіғали кездесті. Белдесуге дейін барған тартысты теке-тіресте қарсыластарын алып ұрған Эшьнар «Жайық барысы» атанды. Осылайша ол өткен жылғы өкініштің орнын толтырып, көптен күткен жеңіске қол жеткізді.
Жарыс қорытындысынды:
🥇 І орын – Эльнар Жанболатұлы (Ақжайық ауданы)
🥈 ІІ орын – Мерей Бердіғали (Сырым ауданы)
🥉 ІІІ орын – Нұрымжан Ғаббасов (Орал қаласы)
Финалдық белдесуден кейін өз әсерімен бөліскен Эльнар Жанболатұлы бұл жеңістің өзі үшін ерекше маңызға ие екенін айтты.
– Өткен жылы межелеген мақсатым орындалмай, көңілімде өкініш қалған еді. Биыл сол кеткен есені қайтарып, чемпион атанғаныма қуаныштымын. Бұл – тек менің ғана емес, мені әрдайым қолдап жүрген бапкерлерімнің, отбасымның, жанкүйерлерімнің және Ақжайық ауданының жеңісі. Маған сенім артқан барша жанға шынайы алғысымды білдіремін. Енді облыс намысын республикалық кезеңде лайықты қорғауға тырысамын, – деді жаңа чемпион.
Облыстық іріктеу кезеңінің жеңімпазы атанған Эльнар Жанболатұлы мен күміс жүлдегер атанған Мерей Бердіғаши облыс намысын «Қазақстан Барысы» республикалық турнирінде қорғайды.
Ұлттық рухтың айнасына айналған «Қазақстан Барысы» – тек жеңімпазды анықтайтын жарыс емес, қазақ күресінің қадірін арттырып, ел ішіндегі балуандық дәстүрді жаңғыртатын үлкен жоба. Биылғы облыстық дода да соның жарқын дәлелі болды.
Енді Жайық жұртының үміті жаңа Барысқа артылып отыр. Барша өңір жанкүйері Эльнар мен Мерейге республикалық бозкілемде де айбынды өнер көрсетіп, Батыс Қазақстанның мерейін үстем ететініне сенім білдіреді.

Түгелбай Бисен
Фото: БҚО СПОРТ