Әнел Сытдықова Солтүстік бұғазды жүзіп өткен алғашқы қазақстандық ару

Батыс Қазақстанның қайсар қызы Әнел Сытдыкова тағы да тарихқа есімін жазды. Ол – Ирландия мен Шотландияны бөліп жатқан дүлей мінезді Солтүстік бұғазды жүзіп өткен алғашқы қазақстандық ару атанды. Қуанышты жаңалықпен Әнел өзінің әлеуметтік желідегі парақшасында бөлісті.

 Қыркүйектің 4-інде басталған сын Әнел үшін теңіздің толқынымен айқасқан 16 сағат 36 минут 19 секундқа созылды. Ақыры, мұздай суға мойымай, бойдағы жігерді қайрап, дегеніне жеткен Әнел солтүстік бұғазды жүзіп өткен әлемдегі 185 жүзгішінің қатарына қосылды.

Бұл кездейсоқ жетістік емес. Бұл талай жылғы маңдай тердің жемісі. Әнелді ел бұрыннан біледі. Ол триатлоннан «Темір ханшайым» атанған тұңғыш қазақстандық. «Ironman» және «Ultraman» сындарында ел намысын абыроймен қорғап жүрген жан.

Ол 2019 жылы-ақ 38 шақырымдық Ла-Манш бұғазын гидрокостюмсіз жүзіп өткенде көпшілік таңдай қаққан. 2022 жылы Манхэттенді айнала жүзгенде 48 жарым шақырымды артта қалдырып, 20 көпірдің астымен өткені ел есінде. Сондай-ақ Лос-Анджелестегі әйгілі «Каталина» бұғазын да тоқтаусыз бағындырды.

Тіпті, Антарктиданың қақаған суына түсіп, оны бағындырған алғашқы қазақ болғаны да бар.

Әнелдің әрбір жеңісі – тек спорттық рекорд қана емес, отаншыл рухтың, қайсар мінездің айғағы. Қиынды жеңген қазақ қызының бүгінгі ерлігі – ертеңгі ұрпаққа үлгі.