BQO-ARLANS болашақтың жобасы

Биыл Батыс Қазақстан спорты үшін тарихи жыл болды десек, қателеспейміз. Себебі, кәсіби клуб мәртебесін алып, ел чемпионатының жоғары лигасына алғаш рет қадам басқан «BQO-ARLANS» баскетбол клубы дебютін жойқын жеңістермен бастады. Атырауда өткен алғашқы турда қарсыластарына дес бермей, төрт ойында жеңіс тұғырынан көрінген оралдық команда бірінші турдың нағыз сенсациясы болды.

Сөздің шыны керек бұл жай ғана кездейсоқ жетістік емес. Бұл – он жылдан астам уақыт бойы төгілген тер мен үздіксіз еңбектің жемісі.

Орал баскетболының тарихын парақтасақ, 2012 жыл ерекше аталады. Сол жылы алғаш рет өңірде балалар мен жасөспірімдер командасы құрылып, Қазақстан чемпионатына қатысқан еді. Бүгін сол топтың жігіттері ел намысын ұлттық деңгейде қорғап жүр. Ал 2014 жылы БЖСМ-да арнайы баскетбол бөлімі ашылып, жас спортшылар кәсіби жаттығуларға ден қоя бастады. 2016 жылы облыстық баскетбол және баскетбол 3х3 федерациясының құрылуы бұл спорттың тамырын тереңге жайды. Сол уақыттан бері өңірде баскетбол чемпионаттары дәстүрлі түрде өткізіліп келеді.

БАТЫСТЫҢ БАЛАЛАРЫ – ЕЛДІҢ ҮМІТІ

13 жылда өңір баскетболы талай жүлдеге қол жеткізді.

• 2017 жылы 2005 жылы туған жасөспірімдер командасы ҚР қысқы чемпионатында қола жүлде иеленді.
• 2019 жылы «BQO-ARLANS» баскетбол 3х3 түрінен Шымкент төрінде ел чемпионы атанды.
• 2021, 2022, 2023 жылдары да бұл дәстүр үзілген жоқ – Батыс командасы қатарынан үш жыл қатар жеңіске жетті.

Бұлар – ел спортына еніп жатқан жаңа буынның ертеңіне деген сенімнің нышаны.

Бүгінгі кәсіби «BQO-ARLANS» баскетбол клубы құрамында түгелдей өз жерлестеріміз өнер көрсетеді. Бірі ҚР спорт шебері, бірі ұлттық құраманың мүшесі. Барлығы да Оралдың топырағында өскен, туған жердің намысын қорғауға келген ұландар. Команданы баптап отырған – тәжірибелі маман, жоғары санатты жаттықтырушы Досым Сейлханұлы Қуанаев.
Оның айтуынша, бұл жетістік бір күннің жемісі емес, жылдар бойғы жүйелі еңбектің нәтижесі.

«Біз көп жылдан бері осы сәтті күттік. Қаржы, мүмкіндік, жағдай деген сылтаулар көп болды. Биыл облыстық федерация мен дене шынықтыру және спорт басқармасы бірлесе қимылдап, арланның арындауына  мүмкіндік берді. Ең бастысы – өзіміздің балалар далада қалмады», – дейді бас бапкер.

АРЛАНДАРДЫҢ МАҚСАТЫ – УАҚЫТША ЖЕҢІС ЕМЕС

«BQO-ARLANS» клубы бір маусымдық жобаны көздеп отырған жоқ. Олар ұзақмерзімді жоспар құрып, жүйелі дамуға ден қойған. Алда  академия ашу, фарм-клуб (U-15) құру, балалар лигасын қалыптастыру міндеті тұр. Бұл – баскетболдың өңірде кең қанат жаюының бастауы. Бүгінгі жас буын ертең кәсіби спортшы болып шығады. Бұл жүйе тек жарысқа қатысу емес, болашаққа жасалған инвестиция. Жалпы кәсіби клубтың құрылуы спорттағы үлкен серпіліс. Мұның пайдасы зор: жастардың спортқа бет бұруы, ұлттық құрамаға жаңа есімдердің келуі, ең бастысы жергілікті мықтылардың өз өңірінде қалуына септігін тигізеді.

Бокстан басталған кәсіби жол енді баскетболда жалғасын тауып отыр.
Арландардың мақсаты тек жеңу емес, Жайықтың атын ел спортының төріне шығару. Оралдың баскетболшылары бүгінде жоғары лигада ойнап қана қоймай, өз мектебін қалыптастырып, келешек чемпиондарға жол ашып отыр.

– Батыстың баскетболы енді ұйықтап жатқан алып емес. Ол оянып, үлкен аренаға бет алды.
«BQO-ARLANS» – соның айғағы.

Түгелбай БИСЕН