Садақшы Әсемгүл Ғалымжанова Мұрат Лұқпанов халықаралық Fetih Kupasі додасында ел мерейін үстем етті

Түркияның Стамбұл қаласында өткен дәстүрлі садақ атудан XIV халықаралық Fetih Kupası турнирінде қазақстандық мергендер жоғары нәтиже көрсетіп, ел абыройын асқақтатты.

Әлемнің 55 мемлекетінен 800-ден астам үздік спортшы бақ сынаған беделді жарыста Қазақстан құрамасының мүшесі Әсемгүл Ғалымжанова әйелдер арасындағы Жамбы нысанасы бойынша сынға түсіп, күміс медальді қанжығасына байлады. Халықаралық аренада дәлдігімен және табандылығымен ерекшеленген спортшының бұл жетістігі – ұлттық спорттың дамуы мен қазақстандық садақшылар мектебінің әлеуетін айқын көрсететін маңызды нәтиже.

Сондай-ақ дүбірлі додада тағы бір жерлесіміз Мұрат Лұқпанов жоғары шеберлік танытып, қола жүлдеге қол жеткізді. Әлемнің таңдаулы мергендері қатысқан жарыста жүлде тұғырына көтерілу – үлкен дайындықтың, қажырлы еңбектің және жеңіске деген жігердің жемісі.

Көне түркі дәуірінен бастау алатын мергендік өнерді бүгінгі ұрпақ лайықты жалғастырып келеді. Халықаралық аренада көк Туымызды желбіретіп, ұлттық спорттың беделін арттырған саңлақтардың бұл жеңісі жас буынға үлгі болып, дәстүрлі садақ атудың дамуына жаңа серпін беретіні сөзсіз.

Әсемгүл Ғалымжанова мен Мұрат Лұқпановты айтулы жетістіктерімен шын жүректен құттықтаймыз! Алдағы жарыстарда да мерейлері үстем болып, Қазақстанның абыройын асқақтата беруіне тілектеспіз!