Азиада чемпионы туған жеріне оралды

Жапонияның Айчи–Нагоя қалаларындағы ХХ жазғы Азия ойындарында каратэден 55 келі салмақта алтын медаль жеңіп алған Жоламан Биғабыл туған жері – Оралға оралды.

Мәншүк Мәметова атындағы халықаралық әуежайда Азия ойындарының чемпионын Орал қаласы әкімінің орынбасары Жандос Дүйсенғалиев, Батыс Қазақстан облыстық дене шынықтыру және спорт басқармасының бөлім басшысы Дәурен Мұқанов, спорт саласының мамандары, жанкүйерлер мен жерлестері  зор қошеметпен қарсы алды.

Жоламан Биғабылдың Азиада төріндегі жеңісі – ел спорты үшін елеулі жетістік. Ол жарыс барысында шеберлігі мен жігерін танытып, Қазақстан қоржынына алтын медаль салды. Чемпионның бұл табысы Батыс Қазақстандағы каратэ мектебінің мерейін үстем етті.

Чемпионды қарсы алу рәсімінде Жандос Дүйсенғалиев спортшыны жеңісімен құттықтап, оның жетістігі өңір жұрты үшін үлкен қуаныш екенін атап өтті.

– Жоламан Азия ойындарында ел намысын абыроймен қорғап, көк Туымызды биікте желбіретті. Бұл – барша батысқазақстандық үшін зор мақтаныш. Жеңіс құтты болсын! Алда бұдан да биік белестерді бағындыра береді деген үміттеміз, – деді ол.

Ал спортшының өзі туған жерге оралып, жерлестерінің ыстық ықыласын сезіну ерекше әсер сыйлағанын айтты.

– Азия ойындарына тыңғылықты дайындалып бардық. Жарыстың әр сәтінде еліміздің, туған жерімнің қолдауын сезіндім. Әр кездесу сайын жауапкершілікті терең түсіндім. Алтын медальға қол жеткізу – мен үшін үлкен қуаныш әрі зор жауапкершілік. Бұл жеңіске бапкерлерімнің, ата-анамның, жанкүйерлердің еңбегі мен сенімі жетеледі. Туған жерге осындай құрметпен оралу – ерекше сезім. Маған тілекші болған барша жанға алғыс айтамын. Бұл жеңіс – жалғыз менің емес, баршамыздың ортақ жеңісіміз, – деді Азиада чемпионы.

Жоламанның бапкері Ринат Мерғалиев те шәкіртінің жетістігі ұзақ жылғы еңбектің нәтижесі екенін атап өтті.

– Жоламан бұл жетістікке тынымсыз жаттығу мен табанды еңбектің арқасында жетті. Азия ойындарындағы әр жекпе-жегі оңай болған жоқ. Шәкіртімгің жеңісіне қуаныштымыз. Бізге қолдау көрсеткен ата-аналарға, жанкүйерлерге және спорт жанашырларына ризашылығымызды білдіреміз, – деді бапкер.

Жоламан Биғабылдың жеңісі – жас спортшыларға үлгі боларлық айтулы жетістік. Азия ойындарының чемпионы туған жеріне алтын жүлдемен оралып, Батыс Қазақстан спортының шежіресіне жаңа жарқын бет қосты.

Түгелбай БИСЕН