Жанкешті жанкүйерлер клубты құтқарып қалды

Германияның «Унион Берлин» футбол клубының тарихында жанкүйерлердің адалдығы мен ауызбіршілігін айқын көрсеткен екі ерекше оқиға бар. Бұл оқиғалар бүгінде әлем футболындағы ең әсерлі мысалдардың бірі ретінде аталады. Сол жанкүйер адалдығы үшін де бұл клубты Германияда ерекше құрметтейді.

2004 жыл: «Унион үшін қан тапсыру» акциясы

2004 жылы команда аймақтық лигаға түсіп қалғаннан кейін ауыр қаржылық дағдарысқа тап болды. Клуб кәсіби мәртебесін сақтау үшін Германия футбол одағына (DFB) міндетті сақтандыру жарнасы ретінде 1,5 миллион еуро төлеуі қажет еді. Алайда мұндай қаражатты табу мүмкін болмай, клуб лицензиясынан айырылу және банкротқа ұшырау қаупінің алдында тұрды.

Осы сын сағатта жанкүйерлер бастама көтеріп, «Унион үшін қан тапсыру» атты қайырымдылық акциясын ұйымдастырды. Германияда қан тапсырған азаматтарға ақшалай өтемақы төленетіндіктен, мыңдаған жанкүйер Берлиндегі медициналық орталықтарға барып, қан тапсырды. Ал алған өтемақыларын түгелдей клубтың арнайы есепшотына аударып отырды.

Сонымен қатар жанкүйерлер қайырымдылық концерттерін өткізіп, естелік бұйымдар сатып, символикалық акцияларды қолға алды. Нәтижесінде қажетті 1,5 миллион еуро уақытында жиналып, «Унион Берлин» кәсіби футболдағы орнын сақтап қалды.

2008 жыл: Стадионды өз қолдарымен жаңғыртты

Төрт жылдан кейін клуб тағы бір күрделі мәселемен бетпе-бет келді. «Ан дер Альтен Фёрстерай» стадионының жағдайы нашарлап, Германия футбол одағы қауіпсіздік талаптарына сәйкес келмейтінін мәлімдеді. Ал жаңа талаптарды орындауға клубтың қаржылық мүмкіндігі жеткіліксіз еді.

Осы кезде жанкүйерлер тағы да ұйымшылдық танытты. Екі мыңнан астам ерікті стадионды өз күштерімен жөндеуге бел буды. Олардың қатарында құрылысшылар, инженерлер, әрлеушілермен қатар кеңсе қызметкерлері де болды. Көпшілік негізгі жұмыстарынан кейін, демалыс күндері мен еңбек демалысы кезінде құрылыс алаңына келіп, ортақ іске үлес қосты.

13 айға созылған жұмыс барысында жанкүйерлер жалпы саны 140 мың сағат еңбек етіп, трибуналарды толық жаңартты, жаңа шатырлар орнатты. Клуб тек құрылыс материалдарының шығынын ғана көтерді.

Осылайша жанкүйерлердің жанкешті еңбегінің арқасында тарихи стадион жабылып қалудан аман қалды. «Унион Берлин» өзінің туған аренасын сақтап қалды. Бұл оқиға футбол тарихында клуб пен жанкүйер арасындағы шынайы сенім мен адалдықтың жарқын үлгісі.

Футбол тек ойын ғана емес. Кейде ол мыңдаған адамның жүрегін біріктіретін, қиын сәтте сүйікті командасы үшін қанын да, уақытын да, күш-жігерін де аямайтын үлкен отбасыға айналады. «Унион Берлиннің» тарихы – соның дәлелі.