ЖӘНІБЕКТІК БАПКЕР ЕУРОПАНЫҢ ҮЗДІК ФУТЗАЛ АКАДЕМИЯЛАРЫНДА БІЛІМІН ЖЕТІЛДІРЕДІ

Жәнібек ауданында туып өскен бапкер Бекзат Жексенбай Еуропаның жетекші футзал орталықтарында тәжірибе жинақтау үшін шетелге аттанады. Ол ақпаратпен бапкердің өзі инстаграм парақшасында бөлісті.

Ол Испания мен Португалияның үздік балалар футзал академияларында өтетін арнайы тақырыптық семинарларға қатысып, әлемдік деңгейдегі жаттықтыру әдістемелерімен танысады. Бағдарлама аясында жас спортшыларды даярлау жүйесі, заманауи жаттығу үдерістері, ойын тактикасы, балалармен психологиялық жұмыс жүргізу және таланттарды анықтау бағыттары қамтылады.

Бұл тағылымдаманың негізгі мақсаты – халықаралық тәжірибені меңгеріп, балалар футзалын дамытудағы озық әдістерді Қазақстанға енгізу. Алынған білім мен тәжірибе аудан және облыс спортшыларының дайындығын жетілдіруге, жас футзалшылардың шеберлігін арттыруға бағытталмақ.

Бапкердің айтуынша, әлемнің алдыңғы қатарлы академияларында жинақталған тәжірибе болашақта өңірдегі футзалдың сапалы дамуына серпін беріп, жас спортшылардың жаңа жетістіктерге жетуіне мүмкіндік ашады.

Айта кетейік Бекзат биылғы маусымда елордалық «Астана» футзал клубының баптады. Оның командасы чемпионатты 8-ші орынмен аяқтады.