Орал татамиінде елдің үздіктері белдеседі

29 тамыз – 1 қыркүйек аралығында Орал қаласындағы «ЖайықАрена» спорт кешенінде дзюдодан ерлер мен әйелдер арасындағы Қазақстан Республикасының чемпионаты өтеді.

Төрт күнге созылатын дүбірлі додаға Астана, Алматы, Шымкент қалалары мен еліміздің 17 облысынан 600-ге жуық дзюдошы қатысады. Елдің әр өңірінен жиналған үздік балуандар ерлер мен әйелдер арасында 14 салмақ дәрежесінде татами төріне шығып, Қазақстан чемпионатының жүлделерін сарапқа салады.

Ересектер арасындағы ел чемпионаты – республикалық спорт күнтізбесіндегі ең маңызды бәсекелердің бірі. Мұнда жеңімпаз атану спортшының жеке жетістігі ғана емес, ұлттық құрама сапына ену жолындағы маңызды қадам саналады. Биылғы чемпионаттың нәтижесі 2027 жылы халықаралық жарыстарда Қазақстан намысын қорғайтын ұлттық құраманы жасақтауда айрықша маңызға ие болмақ.

Сондықтан Орал татамиіндегі әр белдесудің бәсі жоғары. Ел чемпионатында халықаралық аренада Қазақстан қоржынына жүлде салып жүрген тәжірибелі дзюдошылар да сынға түседі. Олардың қатарында Мағжан Шамшадин, Бауыржан Нарбаев, Данияр Шамшаев, Ғалия Тынбаева, Мәди Амангелді, Дидар Хамза, Меруерт Сәрсенова, Аружан Ережепова, Камила Берліқаш және Ақерке Рамазанова бар.

БҚО құрамасы да бабында

Оралда өтетін байрақты бәсекеде облыс намысын ерлер мен әйелдер арасындағы өңірдің үздік дзюдошылары қорғайды. Өз жанкүйерлерінің алдында татамиге шығатын балуандар ел чемпионатында жоғары нәтиже көрсетуге ниетті.

Ерлер:

60 келі: Тоқтар Умиталиев, Асылхан Зинуллин, Темірлан Мендіғалиев, Ерасыл Бақыт.

66 келі: Нұрсұлтан Зайзағалиев, Жантөре Мұхамбетқалиев, Нұрсұлтан Амандық, Нұрлан Исатаев.

73 келі: Нұрхан Зинолла, Тайман Нурғалиев, Серікбай Неғмет, Сұлтанбек Ажғалиев.

81 келі: Саяат Сейтқалиев, Мырзатай Қыдырбай, Әбілмансұр Серікбай, Есбол Сағындық.

90 келі: Архат Өтеген, Данил Кырлов, Нұрбол Серіков, Нұрсейіт Мәдениет.

100 келі: Нұрымжан Ғаббасов, Эльнар Жанболатұлы, Еламан Исмагулов.

+100 келі: Ерназар Хамзин, Мерей Бердіғали.

Әйелдер:

-48 келі: Гүлназ Мәлік, Айару Нұрланқызы.

-52 келі: Айшабибі Мұрадымова, Гаухар Ирмағамбетова, Айкоркем Иосифова, Жансая Камидоллаева.

-57 келі: Ақерке Жұмағалиева, Зарина Ерген.

-63 келі: Әлия Бекқали.

-78 келі: Айсұлу Сарсенова.

-78 келі: Әсел Қазиева.

+78 келі: Карина Такиева.

Өңір палуандар үшін бұл чемпионаттың орны бөлек. Өз жанкүйерлерінің алдында күресетін өңір спортшылары елдің ең мықты дзюдошыларымен иық тірестіріп, облыс қоржынына жүлде салуға талпынады. Жюазда өткен асқар шайхиевті еске алуға рналған ірі жарыста Темірлан Меңдіғалиев өзін жақсы қырынан танытты, Нұрлан Исатаев пен Нұрсұлтан Зайзағалиевтің де де қарқыны қатты екенін білеміз. Мырзатай қадырбай мен Архат Өтеген және Данил Крыловтың да күресі көптің көңілінен шығып жүр. “Қазақстан барысы” турниріндегі жеңілісі жай ғана сәтсіздік екенін Эльнар Жанболатұлы дәлелдесем деген ойда. Ал бұрымды дзюдошылар арасында өзіне назар аудартатын палуандар қатарына Айшабибі Мұрадымованы қосуға болады. Ел чемпионатында қола иеленген Әсел Қазиева мен Карина Такиева және қазақ күресі мен самбода ешкімге есе жібермейтін Ақерке Жұмағалиева мен Айсұлу Сәрсенова барын салса, жүлде алатындай қауқары бар қыздар.

Төрт күн бойы Оралдағы «ЖайықАренеа» спорт кешенінің татамиінде тартысты белдесулер өтеді. Бір белдесу – бір ұпай, бір әдіс – бір жеңіс, ал әр жеңіс спортшыны ұлттық құрамаға бір қадам жақындатады.

Ел чемпионатының жеңімпазы атану үшін үздіктердің өзі аянып қалмасы анық. Ал Жайық жағасындағы татами кімнің мықты екенін анықтайды.

📍 Өтетін орны: Орал қаласы, «ЖайықАрена» спорт кешені
📅 Өтетін күні: 29 тамыз – 1 қыркүйек 2026 жыл
🥋 Қатысушылар: 600-ге жуық спортшы