Дарьяның күмісі – ел мерейі

Филиппин астанасы Манилада өтіп жатқан самбодан Азия чемпионаты Қазақстан спорты үшін жағымды жаңалықпен басталды. Құрлықтың ең үздік балуандары бас қосқан байрақты бәсекеде Батыс Қазақстан облысының өкілі Дарья Забильская күміс жүлдеге қол жеткізіп, ел мерейін үстем етті.

72 келі салмақ дәрежесінде сынға түскен жерлесіміз жарыс барысында жоғары дайындық деңгейін, мықты мінез бен жеңіске деген қайсарлығын көрсетті. Қарсыластарын сенімді түрде жеңіп, финалға дейін сүрінбей жеткен Дарья Азия чемпионатының күміс жүлдесін иеленді. Бұл – спортшының ғана емес, өңірдегі самбо мектебінің жүйелі жұмысының жемісі.

Соңғы жылдары Батыс Қазақстан облысында жекпе-жек спорт түрлері қарқынды дамып келеді. Әсіресе самбо спорты бойынша халықаралық ареналарда топ жарып жүрген спортшылар қатары артып келеді. Дарья Забильскаяның Азия чемпионатындағы жетістігі – осы сөзіміздің нақты дәлелі. Құрлықтық додада күміс медаль еншілеу – үлкен жауапкершілік пен табандылықты талап ететін нәтиже.

Халықаралық жарыстарда көк Туымызды желбіретіп жүрген спортшылардың әрбір жеңісі жас ұрпаққа үлгі болары сөзсіз. Дарьяның табысы өскелең буынды спортпен шұғылдануға ынталандырып, олардың бойында отансүйгіштік қасиетті нығайта түседі.

Дарья Забильскаяны Азия чемпионатындағы жоғары жетістігімен шын жүректен құттықтай отырып, алдағы әлемдік додаларда да ел намысын абыроймен қорғап, жеңіс тұғырынан көріне беруіне тілектеспіз. Жерлесіміздің күміс жүлдесі – Батыс Қазақстан спортының әлеуеті жоғары екенін тағы бір мәрте дәлелдеген маңызды жетістік.