Эрлинг Холанд 72 жыл бойы бұзылмаған тарихи рекордты қайталады

Норвегия құрамасының шабуылшысы Эрлинг Холанд 2026 жылғы футболдан әлем чемпионатында жоғары нәтижелі ойынымен көзге түсіп, тарихи жетістікке қол жеткізді. Турнир аясында өткізген төрт матчта бес гол соққан шабуылшы әлем чемпионаттары тарихындағы сирек кездесетін рекордтардың бірін қайталады.

Холанд алғашқы ойында Ирак қақпасына екі гол соғып, командасының 4:1 есебімен жеңіске жетуіне үлес қосты. Кейін Сенегалға қарсы кездесуде тағы дубль жасап, Норвегияның 3:2 есебімен жеңіске жетуіне ықпал етті. Франциямен өткен матчқа қатыспаған шабуылшы Кот-д’Ивуарға қарсы кездесуде 85-минутта жеңіс голын соғып, құрамасын келесі кезеңге алып шықты. Бұл ойын Норвегияның 2:1 есебімен жеңісімен аяқталды.

Осылайша Эрлинг Холанд әлем чемпионатындағы алғашқы үш негізгі құрамда шыққан матчының әрқайсысында гол соғып, 72 жыл бойы қайталанбаған тарихи рекордқа теңесті.

Бұған дейін мұндай көрсеткішке тек 1930 жылғы әлем чемпионатында аргентиналық Гильермо Стабиле мен 1954 жылғы мундиальда венгриялық Шандор Кочиш қана қол жеткізген болатын.

Осы жетістігінің арқасында Эрлинг Холанд әлем чемпионаты тарихындағы ең үздік шабуылшылардың бірі ретінде тағы бір маңызды белесті бағындырып, есімін аңызға айналған футболшылармен қатар жазды.