Спортты саласы мамандары додаға түсті

Спорт күні кәсіби мерекесі қарсаңында сала қызметкерлері арасындағы өзара ынтымақты нығайтып, салауатты өмір салтын дәріптеуді мақсат еткен III ашық қалалық спартакиада өтті.

Спорт – медаль және жеңіспен ғана өлшенбейтін, ең алдымен елдің рухын көтеріп, қоғамды бір мақсатқа жұмылдыратын күш. Ал сол спорттың өрісін кеңейтіп, бұқараға насихаттап, жас ұрпаққа жол көрсетіп жүрген сала мамандарының өздері де бәсекеге түсіп, алаңда күш сынасты.

«Спорт күні» кәсіби мерекесіне орай ұйымдастырылған III ашық қалалық спартакиада аудандық және қалалық спорт бөлімдері мен спорт клубтарының қызметкерлерін бір арнаға тоғыстырды. Дода барысында спорт саласының мамандары командалық ауызбіршілік пен ұйымшылдықтың, табандылық пен жігердің жарқын үлгісін көрсетті.

Бұл жарыстың басты ерекшелігі де осында. Күнделікті қызметінде спортшылардың жеңісіне жағдай жасап, жарыстарды ұйымдастырып, спорттың дамуына үлес қосып жүрген мамандар бұл жолы өздері спорт алаңына шығып, жеңіс үшін күресті.

Спартакиаданың қорытындысында жалпы командалық есепте Қаратөбе ауданының құрамасы бірінші орынды жеңіп алды. Жәнібек ауданы күміс жүлдеге ие болса, Теректі ауданының командасы үздік үштікті түйіндеді.

Жарыс соңында жеңімпаздар мен жүлдегерлер Орал қаласы дене шынықтыру және спорт бөлімінің арнайы дипломдарымен, медальдарымен және кубоктарымен марапатталды.

Спорт саласының қызметкерлері үшін бұл спартакиада жай ғана жарыс емес, кәсіби мерекенің мәнін айшықтаған тағылымды шара болды. Өйткені спортты дамытатын адам алдымен оның құндылығын өзі сезінуі керек. Ал бүгінгі доданың әрбір қатысушысы осы ұстанымды ісімен дәлелдеді.

Жеңіс тұғырында бір команда тұрса да, бұл мерекеде спорттың мәртебесі бәріне ортақ.

Барша командаларға белсенділіктері, ұйымшылдығы және өңірдегі спорттың өркендеуіне қосып жүрген еңбектері үшін алғыс білдіреміз.

Спортты сүйген елдің рухы биік, болашағы берік!
Кәсіби мерекелеріңіз құтты болсын!